Urte berriak aurrera egin du dagoeneko, eta, horrekin batera, badira aurten gure etxeetan izango diren joera berriei buruzko iragarpen eta teoria ugari, baita alde batera uztekoak ere (oraingoz). Azken urteotan, minimalismoa eta kolore leunak izan dira protagonista. Baina urte berri honetan joera ugari agertu dira, oso bestelakoak. Zer kolore aurkituko ditugu denboraldi honetan? Kolore neutro eta naturalagoak ikusten jarraituko dugu edo atzean utziko ditugu?
Agur espazio huts eta neutroei
Datorrenari buruz hitz egin aurretik, joango denarekin hasiko gara. Aurten, espazio hiperminimalistek protagonismoa galduko dute, kolore neutralak eta uniformetasuna atzean utziko ditugu, eta espazio bereziago eta indartsuagoei leku egingo diegu. Gure nortasuna funtsezkoa izango da, eta vintage objektuak, artelanak edo neurrira egindako altzariak bezalako pieza paregabeen bidez erakutsiko dugu hori.
Espazio koloretsuak itzuli dira
2024. urte honetako Pantone of the Year 12-1023 Peach Fuzz kolorea izan arren, urdinak, herdoil koloreak eta gorrixkak dira denboraldi honetan modan daudenak, kromatuekin eta zilarreztatuekin batera, eta hori 2023aren amaieran ikusten hasiak ginen. Kolore-sorta neutraletan, txokolate marroia izango da gogokoenetan gogokoena, egur-kolore ilunekin batera.
Sukalde oso funtzionalak
Gure sukaldeetan, maila estetikoan, ez da aldaketa handirik egongo, baina bai funtzionaltasunean. Aurten amaituko den trantsizioa bizitzen ari gara. Ikusi dugu nola gure armairu ezkutuak, lehen janaria edo ontziteria gordetzekoak, etxetresna elektriko txikiz bete diren, horietako asko espezialitatekoak. Ondorioz, sukaldea leku funtzional ez ezik, arnasgune ere bihurtu da. Kafe guneak dira irabazleak.
Gora xakea!
Azken iragarpena da xake erako laukiak denboraldi honetan geratuko direla –eta indartsu dator–. Zoruetan, hormetan eta ehunetan ikusiko dugu. Gogoratu beharra dago jantzi joerei erreparatu behar diegula, etxe barruan zer gertatuko den jakin nahi badugu, eta zerbait modan dagoenean, bereziki, akabera gogorrenetara eta aldatzeko zailenetara eramaten baditugu, hala nola zoruetara edo hormetara, benetan gustatzen zaigula ziurtatu behar dugu, modan egon arren, denbora luzez izango baitugu gure bizitzetan. Hori dela eta, aukera ona da, xake erako laukiak kuxinetan edo dekorazio elementu chic-etan erabili dezakegu, estanpatu oso astuna ez badugu nahi.