Bilboko Udalak eta Azkue Fundazioak YouTuben euskarazko edukiak zabaltzeko lantegia antolatu dute

Lehen mailako bi lantegi abenduaren 26an eta 27an eskainiko dira, eta hirugarrena, urtarrilaren 2an eta 3an

UNAI GANDARIAS /2019-12-09/ Bilboko Udalak eta Azkue Fundazioak ‘B-Tuber. Youtuber izarren bila!’ izeneko lantegia antolatu dute, elkarlanean. Hirian erroldatutako gazte 11 eta 13 urte bitartekoentzat izango da, eta parte hartzaileek aukera izango dute euskarazko ikus-entzunezkoak sortu, editatu, konpartitu eta Youtubera igotzen ikasteko, modu errazean eta segurtasunez. Lantegiak abendua amaieran eta urtarril hasieran izango dira.

Antolatzaileek jakinarazi dutenez, lantegiaren xedea da gazteek ikastea beharrezkoak diren mekanismo guztiak beren bideoak euskaraz sortzeko, editatzeko eta Youtuben jartzeko. Izena emateko epea igandean bukatuko da, abenduaren 8an, eta interesdunek www.bilbao.eus web orrian egin dezakete izen-ematea.

Guztira, 60 plaza eskainiko dira lau lantegitan banatuta, 15 parte hartzaile izanik bakoitzeko. Eskaintzen diren plaza guztiak betetzen badira, itxaron zerrenda bat egongo da, eta, eskatutako lantegian lekuren bat libre geratzen bada, zerrendako lehenari deituko zaio. Saio guztiak euskara hutsean izango dira, eta, beraz, parte hartu nahi dutenek euskaraz jakin beharko dute.

Lantegiek bi maila izango dituzte: hasierakoa eta hobetzekoa. Hasierakoan parte hartuko dute ikastarootan lehenago parte hartu ez dutene, eta hobetzekoan, aldiz, beste aldi batzuetan hasierako mailakoetan parte hartu dutenek. Zortzi orduko lantegiak izango dira, eta bi saiotan emango dira, bakoitza lau ordukoa, 09:30etik 13:30era, Euskararen Etxean.

Hasierako lantegiak hiru izango dira: abenduaren 26an eta 27an bi izango dira, eta urtarrilaren 2an eta 3an hirugarrena. Hobetzeko lantegia abenduaren 2an eta 3an izango da.

Pokemon Espada / Pokemon Escudo

Nintendo Switch bideo-kontsoletara jatorrian sortutako jokoa da.

A. GOIKOETXEA /2019-11-25/ Pokemon RPG formatuetara eraman dute: Pokemon Espada eta Escudo. Hala ere, Nintendo Switch bideo-kontsolan estreinatutako bideo-jokoak zeresan handia eman du, antza, ez duelako Game Freak ekoiztetxeak ohituta gaituen kalitate bera eskaintzen. Hala ere, badago bideo-joko ona dela dioen jendea; beraz, onena litzateke zuk zeuk probatzea.

Txanden bidezko borrokak dira nagusi hemen, eta denetariko arerioak topatuko dituzu. Horien artean, Pokemon erraldoiak ere bai. Zure sormena garatu beharko duzu, horiek akabatzeko.

Need for Speed Heat

PC, PS4 eta Xbox One plataformetarako eskuragarri dago.

A. GOIKOETXEA /2019-11-25/ Bideo-joko ohikoenetarikoa dugu Need for Speed: Heat atala kaleratu dute aurten, eta, aurrekoetan bezala, abiadura kontrolpean edukitzea da erronka nagusia. Kontrolik gabeko abiadurak ez duela ezertarako balio jabetuko zara Need for Speed: Heat bideo- jokoan jolastean. Atal honek eskaintza berriak ere egiten
ditu, baina, egia esan, ez diote gainbalio handirik ematen. Bideo- joko honek duen hutsegite larriena da bere sustraiei uko egin eta joera berriak jorratzera ekin diola.

Star Wars Jedi Fallen Order

PS4 eta Xbox One erabilgarria da.

A. GOIKOETXEA /2019-11-25/ Electronic Arts etxeak garatzen duen Star Wars sagaren lehenengo atala da hau. Rol abentura honetan, pertsonaien azalean sartu ahal izango zara, laser ezpata ospetsua esku artean hartu, eta arerioen aurka borrokatu. Oraingoan, aukeratutako pertsonaiak amnesia du; horregatik, pixkanaka pista bereziak aurkituko dituzu, pertsonaia ezagutzeko eta bere iraganaren berri izateko. Gainera, ezin dugu ahaztu zein den joko mota hauen helburu nagusia: mundua salbatzea. Beraz, hartu agintea eta ekin lanari!