Belaunaldi Berriak dira Alderdi Popularreko gazteen antolaketa. Erakunde politikoa da, zentro erreformistako gazteena, bokazio europazalea duena eta ekintza politikoaren oinarri diren gazteak ardatz dituena. Pablo Euskadiko pre- sidentea da, urte bete darama karguan.
Beti atentzioa eman dizun zerbait al da politika, edo arrazoi bereziren batengatik erabaki duzu politikan sartzea?
Egia esaten badizuet, beti eman dit atentzioa. Baina horri gehitu behar zaio erronkak gustatzen zaizkidala, eta Euskadiko PPko kide izatea hala da. Madrilen edo hegoaldean jaio izan banintz, uste dut ez nintzatekeela inongo alderdi politikotan afiliatuta egongo. Nazionalismoaren aurka egiteko eta alternatiba bat dugula erakusteko lana dugu.
Euskal gizartean politikak beti izan du pisu handia; gaur egun ere hala da?
Politikak gauza guztietan du pisua. Erakundeek hartzen dituzten erabaki guztiek zuzenean eragiten diote herritarren egunerokotasunari. Gaur egun, pertsona askok, bereziki gazteek, politikarekiko eta erakundeekiko konfiantza galdu dute. Askori bezala, ez zait gustatzen egungo giro politikoa. Politikan, moderazioa eta jardunbide egokiak berreskuratzeko lan egin behar dugu.
Uste duzu PP aukera politiko erakargarria dela euskal gazteentzat? Zer eskain dezake PPk, gainerako euskal alderdiek eskaintzen ez dutena?
Euskadin, azken 40 urteotan, EAJk ia erakunde nagusi guztietan gobernatu du. Euskadik pisua galdu du, sektore estrategikoetan errefe- rente izateari utzi dio, ez dugu aberastasuna eta talentua erakartzeko dugun gaitasuna aprobetxatzen. Eta hori gehien sufritzen dugunak gazteak gara, gure etorkizun osoa aurretik baitugu. Duela gutxi, EUROSTATek bere zerrenda beltzean jarri zuen Bilboko eta Gasteizko gazteen langabezia, besteak beste.
Feminismoak eztabaida sutsuak eragiten ditu zure alderdian. Gai gatazkatsua da zuen programan?
Ez horixe. Beste gauza bat da ezkerreko premisa askorekin ados ez egotea. Beti argi izan dugu benetako berdintasuna sustatzen duten politika guztiak babestu behar ditugula, emakumeak merezi duten lekua hartzera eramango dituzten politikak babestu behar ditugula, eta gure herrialdeko itun handien sustatzaile ere izan gara emaku- mearen aurkako indarkeria desagerrarazteko.
Zein esparru proposatuko zenuke euskal lurralde-arazorako eta Euskadiren berezko nortasunerako?
Konstituzioa eta Gernikako Estatutua dira euskal gizarteak arlo horretan lortu dituen lorpen handienak. Espainia batua, askotarikoa eta plurala defendatzen dugu, gure lurraren berezitasunak aitortuko dituena. Nazionalismoak lurralde-konfrontazioko politikak bilatzen ditu, biztanleria zatitzen dutenak, eta guk, aldiz, bizikidetzarako eta desberdinarekiko errespeturako esparru handiak defendatzen ditugu. Ez dago lehen eta bigarren mailako euskaldunik.
Horregatik, independentziaren bandera astindu beharrean, erakundeek gure foru-sistemak eskaintzen dizkigun abantailak aprobetxatu beharko lituzkete, talentuaren eta aberastasunaren erakarpenean, berrikuntzan edo aitzindari izateko adimen artifizialaren gorakadaren aurrean.
Gazteek kontuan hartzen gaituztela uste duzu? Zer eskatuko zenieke erakunde eta agintari publikoei gazteen beharrak asetzeko?
Duela gutxi 50 hauteskunde-proposamen egin ditugu ildo horretan. Urrats gehiago eman behar ditugu gazteen enpleguaren alde. Gazteei eta enpresei erraztasun gehiago ematea lehen enplegua lortzeko edo unibertsitateko praktikak egiteko. Unibertsitate-sistema ez hain politizatua eta hezkuntza-kalitate handiagokoa sustatzea. Gazteei beren udalerrietan etxebizitza eskuratzeko erraztasunak ematea, gaur egun prezioak garestiegiak baitira. Euskadiko hainbat eremutan bizi den segurtasunik eza amaitzea, gazteak baitira kaltetuak.
Zuen alderdiko gazteek harremanik al dute edo beste alderdi politikoekin lan egiten al dute helburu berberak lortzeko? Hala bada, zein?
Beti izan gara beste gazte-erakunde batzuetako gazteekin etengabeko elkarrizketan aritzearen aldekoak, bai beste alderdi batzuetakoekin, bai erakunde ez-politikoetakoekin. Oso aberasgarria eta positiboa da alderdi politiko bateko kide izatea.
Zure ustez, gazteek zer ikuspegi dute bizitza politikoaz eta zer neurri hartu beharko lirateke ustelkeria desagerrarazteko, gaitz endemikoa dirudielako eta ia alderdi eta erakunde guztietan etengabe agertzen delako.
Nire ustez, gazte askok urruneko mundu bat balitz bezala bizi dute politika, haien kezkekin zerikusirik ez duena. Eta errealitate horrek autokritika eginarazi behar digu. Beharbada, une askotan ez gara herritarrengandik hurbil egoteko gai izan.
Ustelkeria da, zalantzarik gabe, politikaren gauzarik nazkagarriena, eta logikoa da horregatik herritar askok politikarienganako konfiantza galdu izana. Irtenbiderik onena eredugarritasuna eta herritarrekiko hurbiltasuna da. Politika egiten dugunok ez gara inor baino gehiago, eta ez dugu inor baino gehiago garela sinetsi behar.
Azken urteotan, Voxek gero eta jarraitzaile gehiago ditu, bai gazteen artean, bai pertsona helduagoen artean. Nola ikusten duzue eskuin muturraren gorakada hori?
Benetan, desatsegina egiten zait politika hain polarizatua ikustea. Azken 40 urteetako gobernurik erradikalena dugu, eta logikoa da herritar askok bizi duten haserrea. Hori esanda, ez zait gustatzen VOXen politika egiteko modua, ezta gaur egun dugun polarizazioa ere.
Ea laster itzultzen garen gune zentrista batera, politika serioetara, adiskidetasunera eta ezberdinen arteko akordiora.
Abortuak desadostasun ugari eragiten ditu herritarren eta alderdi politiko askoren artean. Horren adibide garbia da Gaztela eta Leonen izandako eztabaida sutsua. Zer deritzozu horri?
Abortua garaipena dela esaten duena oker dabil. Ez dut inor ezagutzen abortatu izanaz pozten denik. Ama izateko baliabiderik ez izateagatik abortatzeko asmoa duten emakume askoren larruan jarri behar da. Amatasuna eta jaiotza-tasa bultzatu behar ditugu, are gehiago Euskadik arazo demografiko ikaragarria duenean.