Alacant Valentziako Erkidegoko hiri eta udalerri bat da, Mediterraneoko kostaldean kokatua. “Alacant” hitzak Akra Lefki greziarrean du jatorria, eta “muino zuria” esan nahi du. Ziur asko, hala deituko zioten gaur egun ere hirian nagusi den gotorlekuagatik: Santa Barbara gaztelua, Benacantil mendian kokatua, Alacanteko badia ikusten den lekuan. Hiriko monumenturik enblematikoena izateaz gain, gaztelu hau Interes Kulturaleko Ondasuntzat jotzen da 1961az geroztik. Udaletxea da beste eraikin zibil garrantzitsuenetako bat. Eraikin zibil barroko hori XVIII. mendekoa da, eta fatxadan elementu apaingarri nagusiak nabarmentzen dira: zutabe salomondarrak eta bi dorreak.
Zabalgune enblematikoan dagoen Carbonell Etxea 1922 eta 1925 artean eraiki zuten, Enrique Carbonell ehun-fabrikatzailearen aginduz. Eraikina Alcoyko ehun-fabrikatzaileek Lehen Mundu Gerraren garaian zuten aberastasunaren erakusgarri da.
Hiriko erlijio-arkitekturak askotariko eraikinak ditu: basilikak, konkatedralak, monasterioak eta ermitak. Santa Maria basilika hiriko zaharrena da, XIV. mendekoa. Habearte bakarra du, gurutzadurarik gabea, eta kontrahormen artean kaperak ditu alboetan. San Nikolas konkatedrala 1600. urtean hasi ziren eraikitzen, aurreko eraikin bat ordezteko. Errenazentista herreriano estilokoa da, eta hiriaren erdigunean dago. Santa Faz monasterioa barroko estilokoa da, hirigunean dago, eta, herri-tradizioaren arabera, Jesusen aurpegi odoldua Kalbarioko bidean lehortzeko erabili zen mihisea dago bertan.
Benidorm
Alacantetik ordubeteko distantziara Benidorm hiria dago. Hiriaren ezaugarri erakargarrienetako bat bertako klima ona eta hondartza handiak dira. Alde Zaharreko kaletxoek Sant Jaume begiratokira gidatzen dute bisitaria, Levanteko hondartzara begira, edo Santa Ana plazara, lau kanoik setiatua, eta Gazteluko plaza zeharkatuz, bisitaria Mediterraneoko Balkoira ere irits daiteke.
Benidormek Europako parke tematiko garrantzitsuenetako bi ditu: Aqualandia, txirrista azkarrak eta igerileku handiak dituen Europako ur-parke handienetako bat, eta Terra Mítica, Egipto, Erroma eta Greziako kulturetan girotua, zeinak hainbat errusiar mendi eta ikuskizun dituen.
Gastronomia
Alacanteko janari tipikoak Mediterraneoan du funtsezko oinarria, eta elementu asko ateratzen dira bertatik. Alacanteko paellak bertsio asko ditu, osagai nagusien arabera: arraina, haragia, oilaskoa, untxia, barazkiak… baina guztiek dute elementu komun bat: salmorreta, hau da, sofritua, non gero arroza erregosi egiten den.
Beste plater tipiko bat Alacanteko olleta da, lekaleekin, barazkiekin eta txerriarekin prestatua, edo gachamina, irinarekin, baratxuriekin, olioarekin eta lukainkarekin egindako tortilla moduko bat.
Bertako gozoki ezagunenen artean turroia dago, eztiarekin eta arrautza-zuringoarekin egina, edo toña: okindegiko masa bat da, opil suitzarraren antzekoa.