Genero-identitate ez-normatibo ugari daude, orain ezagutzen ari direnak
“Nik ere nerabezaroan nire nortasunari eta itxurari buruz pertsona gehienek izan ohi dituzten segurtasun gabeziak pairatu nituen, baina noizean behin dutxatik irtetean edo janzten ari nintzela ispiluan nire irudia begiratu eta sexu-erakarpen uholdea sentitzen nuen”, azaltzen zuen emakume batek, Radhika Sanghani kazetariak BBC-en zabaldutako erreportaje batean. Artikulu horrek eragin handia izan zuen argitaratu zenean, orain dela hiru urte: “Nire gorputzak berak erakartzen ninduen sexualki, jende gehienari gertatzen ez zaion moduan”. Beraz, jendea bere gorputzak erakarrita senti daiteke, eta beste pertsona batek baino gehiago kitzikatzen ditu. Baina nola liteke? Bada, saiatuko gara azaltzen zer den eta ez dela autosexuala izatea ahalik eta argien gera dadin: ez da autoestimu hutsa, ezta zeure burua asko maitatzea. Hau guztiaz haratago doa. Era berean, ez zara autosexuala, asko masturbatzen zarelako. Pertsona autosexuala bere itxura fisiko eta izaeragatik beste edonorengatik baino erakarriagoa sentitzen den pertsona da, eta bere buruarekin harreman erromantikoa izateko gogoz dago.
Baina orduan orientazio sexualtzat har daiteke bai ala ez? Emma Placer sexologoak El País egunkariko artikulu batean azaltzen duenez, “berez sexu-orientazioa da, baina nahasmena sortzen du gutxi ezagutzen delako”. Alde horretatik, zientzialariek zailtasun dezente dituzte definitzeko, ez baitago horri buruzko informazio askorik.
Uste da Bernard Apfelbaum terapeuta sexuala izan zela terminoa sortu zuen lehen pertsona 1989an argitaratutako artikulu batean. Apfelbaumek berariaz erabili zuen beste norbaitek sexualki erakartzeko arazoak dituzten pertsonak aipatzeko. Gaur egun, termino hori erabiltzen da nagusiki (baita modu esklusiboan ere) beren gorputzak erakartzen dituen pertsonak aipatzeko, nahiz eta ez duen esan nahi beste pertsona batzuekin ere sexu-harremanik ez dutenik.
“Badakit nire lagun gehienak kitzikatu egiten direla beren sexu-bikoteengan pentsatuz. Beraiekin ez badaude, haiekin fantasiak imajinatzen dituzte. Niretzat desberdina da. Beste pertsona batzuekin sexuaz gozatzen dut, baina orgasmora iristeko neure burua ukitu eta neure buruaz pentsatu behar dut”, azaltzen dio emakumeak BBC-ko kazetariari.