Zurrunbilo, euskal arte eszeniko garaikideen jaialdia irailaren 23tik 25era

Zurrunbilo zazpigarren ediziora iritsi da, hasierako helburuari eutsiz: “Euskarazko sorkuntza eszeniko garaikideari denbora eta espazioa eskaintzea”.

Horretarako, publiko berriengana hurbiltzen, tokiko konplizitatea sortzen eta beste lurralde historikoetako beste programa eszeniko batzuekin loturak sortzen saiatu da. Hori guztia diziplinarteko ikuspegi batetik (hitza dantzarekin, performancearekin eta beste lengoaia batzuekin nahastuz).

Jaialdia Parasite Kolektiboak eta Sala Baratzak antolatzen dute, Gasteizko Udalaren, Arabako Foru Aldundiaren eta Laboral Kutxaren babesarekin.

Zurrunbiloko programazioa

Formol Lab konpainiak jaialdia irekiko du irailaren 23an, ostirala, ALBUM antzezlanarekin.

Asko hitz egin izan da gazteoi buruz. Millennialok oinordetzan hartutako erantzukizunak kudeatu ezinean gabiltzanaren diagnosia jaso dugu. Ondorengo hitzekin definituak izan gara: infantilak, prekarioak, frustrazioari intoleranteak, grinik gabeak, bizitzan galduak, gainformatuak. Baina zer daukagu guk esateko? Zer espero da gutaz? Nor gara gu?. Hor uzten dute gogoeta…

Irailaren 24an, larunbata, KAMIKAZE proposamenen txanda izango da. KAMIKAZE GAUA ekimen esperimental gisa sortu zen, non diziplina guztietako artistei proposamen bat egitea proposatzen zitzaien: Oier Guillanen testu batetik abiatuta eta bete beharreko dekalogo batekin jarraituz. Hautatutako lau proposamenek laguntza ekonomikoa jaso zuten, baita egoitza bat Baratza Aretoan egiteko aukera ere. Artista gazte eta emergentek egindako pieza horien emaitza esklusiban ikusi ahal izango dugu gau horretan.

Zurrunbilok irailaren 25ean, igandea, bere programazioa itxiko du, ATX Teatro konpainiaren azken lanaren estreinaldiarekin, BALBEA.

Iñaki Ziarrustaren laugarren bakarrizketak heriotzari buruz hitz egiten digu.  Egunen batean, momentu bat ailegatzen da non bizitza amaitzen den. Baina prest al gaude hiltzeko? Ez edozein modutan, ez.

Ikusle kluba

Proposamen eszeniko horiez gain, eta EHAZE, Euskal Herriko Antzerkizale Elkartearekin lankidetzan, IKUSLE KLUBA egingo da larunbatean, 18:00etan. Publikoarekiko harreman-bide berriak aztertzeko gune bat, hausnarketa eragin eta arte eszeniko garaikideetara hurbiltzeko bide berriak ireki nahi dituena. Sarrera doakoa da baina erreserbatu egin behar da reservas@salabaratza.com helbide elektronikoan.

Sarrerak salgai

Zurrunbiloko ikuskizun guztietarako sarrerak eskuragarri daude jada www.salabaratza.com web orrian. Sarrera aurreratuak 8€ balio du (10€ leihatilan) eta jaialdi osorako bonuak 20€. Ostiral eta larunbateko emanaldiak 20:00etan izango dira eta igandekoa 19:00etan.