BBK Mendi Film Bilbao Bizkaia jaialdiaren 15. edizioaren Sail Ofizialera lanak aurkezteko epea gaur amaituko da, irailaren 15ean. Izen-ematea http://mendifilmfestival.com/MFF/index.php/eu/inscripcion/in… web orrian egin daiteke, antolatzaileek gogorarazi dutenez.
Jaialdia abenduaren 9tik 18ra ospatuko da, eta mendiko zinemako mundu osoko pelikula berri asko aurkeztuko dira bertan, maiz egileak nahiz protagonistak Bilboko aretoetan bertan direla. Antolatzaileek adierazi dute jada maila handiko filmak daudela izena emanda, eta, ohi bezala, “azken txanpan aurkeztu litezkeen harribitxien esperoan” daude.
Behin izena emateko epea amaituta, hautaketa lanak egin eta urri erdialdera jakinaraziko da aurtengo Sail Ofizialeko pelikulen zerrendaren berri. Aurtengo edizioko sarreren salmenta, berriz, bihar aktibatuko da, irailaren 16an. Aurrez eta denboraz erosteak abantaila eta prezio merkatze nabariak izango ditu. Hiru fasetan egingo da aurretiko salmenta: bihartik urri erdira lehena, handik azaro erdira bigarrena, eta jaialdia hasi bitarte hirugarrena.