Emakundek berdintasuna sustatzeko eskola-agendak banatuko ditu

Eusko Jaurlaritzako Berdintasuna, Justizia eta Gizarte Politiketarako Sailak 80.000 eskola-agenda baino gehiago banatuko ditu iraileko lehen egunetan, Emakunde Emakumearen Euskal Erakundearen bitartez, Derrigorrezko Bigarren Hezkuntzako (DBH) ziklo osoko ikasleen artean. Agenden helburua da neskak eta mutilak sentsibilizatzea emakumeen eta gizonen berdintasunaren eta errespetuan, autonomian eta aukeratzeko askatasunean oinarritutako harremanen alde, rol eta estereotipo sexistak alde batera utzita.

Ekintza bat dator Emakumeen eta Gizonen Berdintasunerako VII. Planean jasotako balio aldaketa lantzeko ardatzarekin. Bertan jasotzen da ikastetxeak gune garrantzitsuak direla sentsibilizaziorako, neskak eta gazteak berdintasunaren aldekoak izateko giltzarri baitira, Emakundek jakinarazi duenez.

2022-2023ko eskola-agendak berdintasunarekin eta pertsona guztiekiko errespetuarekin lotutako eguneroko egoeretan eragiten duten mezuak biltzen ditu, besteak beste, bizitza proiektuak aukeratzeko askatasuna, nesken gauzak eta mutilen gauzak daudela ezartzen duten estereotipoak desagerrarazteko beharra, zaintzak pertsona guztien bizitzan duen garrantzia eta zaintza lanak banatzeko beharra, aniztasunaren errespetua edota pertsonen autonomia indartzea.

Halaber, gorputz perfektuen tirania salatzea, auto-estimuaren eta ahalduntzea bultzatzeko beharra, neska ala mutil izan sentimenduak adierazteko beharra, neska eta mutilen arteko adiskidetzea eta enpatia haien harremanetan edota emakumeek historian zehar egin dituzten ekarpenak goraipatzea moduko mezuak ere jasotzen ditu.

Gainera, ekainaren 15ean aurkeztu zen Berdintasunaren eta Emakumeen Aurkako Indarkeriarik Gabeko Bizitzen Aldeko Herri Itunaren hamar puntuak zabaltzen dira agendaren bitartez. Erakundeak eta herritarrak Emakunderen webgunearen bidez atxiki daitezke itun horretara.