Glad is the Day jaialdiaren seigarren edizioa ospatuko da abuztuaren 28an Donostiako Cristina Enea parkean, eta 20 bat taldek parte hartuko dute, hala nola Lie Detectors eta Adios Amores. Jaialdia doakoa da eta Donostia Kulturako kultur etxeek antolatu dute, Dabadaba eta Le Bukowski aretoek koordinatuta.
Kontzertuekin batera, DJ saioak, piknikak, azokatxoa eta haurrentzako jarduerak izango dira 11:30etik 20:30era. Gainera, jaialdiaren bezperan, abuztuaren 27an, Musikagelaren proposamenetako baten kontzertua izango da Tabakalerako barneko plazan.
Horrela, Glad is the Day jaialdiko agertoki nagusitik igaroko dira Goxuan Salsa, Lukiek, Querakt Lahoz, Adios Amores, Lie Detectors, 33EWE, Lurrin eta Teko Maisin. Halaber, hip-hop eta hiri soinuek tokia izango dute, Ben Yart, Hofe x 4:40, Topanga Kiddo, La Mia Mari, Juicy Bae, Umami, Ttrraaccaa eta MBODJ & Baba Sy-rekin.