AEK-k martxan du 2022-2023ko ikasturterako aurretiko izen-ematea, eta ekainaren 30a baino lehen aurrematrikula egiten dutenek %5eko deskontua izango dute datorren ikasturteko matrikularen prezioan.
Izen-emateak AEKren edozein euskaltegitan egin daitezke, edota 673 200 100 eta 946 464 000 telefonoetan eta www.aek.eus webgunean. AEK-ko ordezkariek adierazi dutenez, “oso pozik” daude aurtengo ikasturtearekin, batetik, pandemiaren eragina euskaltegietatik guztiz desagertzen ari delako eta, bestetik, aurten aurreko ikasturtean baino %5 ikasle gehiago matrikulatu direlako euskara ikastaroetan.
Orain, datorren ikasturtea prestatzen ari dira, eta helburu nagusitzat dute jende gehiagorengana iristea. Hala, euskaltegietan aurrez aurreko taldeak izango dira, autoikaskuntza, sareko ikastaroak eta jardun biko eredua ere eskainiko dira, eta Foruko barnetegia urte osoan irekiko da.