Doctor Deseo talde bilbotarrak kontzertua eskainiko du ekainaren 18an Ereaga hondartzan, eta hasiera emango dio Getxoko (Bizkaia) Kultur Etxearen udako programazioari. Aurretik Anita Parker taldea arituko da, eta sarrera doakoa izango da, Getxoko Udaletik jakitera eman dutenez. Francis Diez abeslaria buru duen Doctor Deseo taldea ‘Berriro zuekin’ biran murgilduta dabil, eta ‘Maketoen iraultza’ azken diskoaren kantak ere aurkeztuko ditu Ereagako kontzertuan.
Bilbon 1980ko hamarkadaren hasieran sortu zen Doctor Deseo. Gaur egun, Francis Diez (ahotsa), Josi Jimenez (baxua), Luis Javier Saiz Txanpi (bateria), Raul Lomas (teklatuak), Aitor Agiriano Toro (gitarra) eta Joe González (saxoa) dira kideak. 17 disko grabatu dituzte, “ukitu elektroniko eta hunkigarria duen rockarekin”. Kaleko gaiak eta pertsonalak dira abestien hitzen ardatzak.
Bestalde, Anita Parker taldea Arrasate, Bilbo eta Lakuntza artean jaio zen. Ane Martinez abeslaria eta burua aurretik Zango taldean aritu zen, eta Olatz Andueza (Skalariak), Iñaki Bengoa eta Jon Zubiaga Osoron (azken biak Gosetik etorriak) laukotea osatzen dute. Taldearen debuta 2017an iritsi zen, ‘Anita Parker’ lanarekin; 2018an ‘Anita Parker!’ kaleratu zuten, eta 2021ean ‘Reset’. Erritmo elektronikak eta swing soinuek markatutako estiloa landuz joan dira, beste eragin batzuk alde batera utzi gabe.
Ekainaren 18ko emanaldia 21:00etan hasiko da, Anita Parker bandaren eskutik. Ondoren, 22:30 aldera, Doctor Deseo arituko da. Aurreko urteetan bezala, sarrera doakoa izango da.