HAIZEARI BEGIRA

Egilea: Jon Ariza de Miguel

Argitaletxea: Elkar

Nire leiho pareko etxean ez zegoen inor, baina te katilua bukatzen ari nintzela argia piztu zen gortinen atzetik, eta pertsona baten itxura sumatu nuen. Nolabait, argi iturria haren atzean zegoen eta pertsonaren itzala proiektatzen zuen gortinen aurka. Pertsona hura arropa eranzten hasi zen: jaka edo zamarra edo berokia lehendabizi, jertse bat gero, kamiseta, eta prakak. Segundo pare batez desagertu zen, eta berriro agertu zen arropa janzten, pijama ziurrenik. Berriro ere desagertu, eta laster agertu zen, eskuan zer edo zer zeukala. Ahora eramaten zuen moduagatik igarri nuen katilu bat zela. Agian tea edaten ari zen?