Oier Iruretagoiena (Errenteria, 1988) izango da Artea Abian 2021 ekimenaren protagonista. San Telmo Museoaren eta Kutxa Fundazioaren ekimena da, eta bere karrerako lehen urteetan dagoen baina esperientzia duen lurraldeko artista baten urteko erakusketa monografikoa antolatzean datza.
Artea Abian-ek Nagore Amenabarro artistari eskaini zion hasierako edizioa, eta urrian Oier Iruretagoienaren erakusketa antolatuko du San Telmoko Laborategi Aretoan.
Programa honen helburua da Gipuzkoan jaiotako edo “lurralde honi lotutako” artista plastiko eta bisualei erakusketa-espazioak eskaintzeko beharrari erantzutea, “Lotura hori modu zabal eta irekian ulertuta”, adierazi zuen atzo museoak.
Artea Abian-ek ez du adin-tarte zehatzik ezartzen, eta aurretik ibilbide bat izan duten sortzaileei zuzenduta dago; izan ere, erakusketa kolektiboetan eta lehiaketetan erakutsi dute, baina ez dute museo edo erakunde batean aurkezpen monografikorik izan.
Erakusketak urteko azken hiruhilekoan egiten dira, Laborategi Aretoan programatu ohi diren gainerako erakusketen antzeko iraupena dute eta argitalpenarekin batera katalogo bat egiten da.
Ibilbidea Oier Iruretagoienak musika esperimentalean hasi zuen bere ibilbidea, baina gerora beste formatu batzuetara zabaldu da, hala nola, eskulturara eta testura.
2011n Arte Ederretan lizentziatu zen UPV/EHUn, eta 2018an Bruselako WIELS egoitzen programa osatu zuen. Bilboko Carreras Mugica galerian, Bartzelonako Halfhouse gunean eta Gasteizko Montehermoso Kultur Etxean egin ditu erakusketak, besteak beste. Generación 2020 erakusketa kolektiboetan ere parte hartu du La Casa Encendida (Madril, 2020), Bi Dos Two, Azkuna Zentroan (Bilbo, 2018), Cale, cale, cale! Caale!!! Tabakaleran (2017) eta Otzan Elba Benítez galerian (Madril, 2016).