Bizkaiko Foru Aldundiak, Gobernu Kontseiluan, ekitaldi honetan Bizkaian kultur proiektuak bultzatzeko dirulaguntzen deialdia onartu du. 1.768.000 euroko laguntza-ildoaren helburua da kalitatezko kultura-eskaintza indartzea, tokiko kultura-eragileei laguntzea eta lurraldearentzat interes berezia duten ekimenak garatzen laguntzea.
Laguntza hauen bitartez, foru erakundeak kultur arloan lan egiten duten elkarte, enpresa eta toki entitateekin elkarlanean dihardu, euren jarduera garatzeko eta sustatzeko baliabide ekonomikoak emanez.
Aurrekontuko zuzkidurari esker, kultura- eta lurralde-garrantzia duten proiektuak babestu ahal izango dira, bai eta Bizkaiko sormen- eta kultura-sarea indartu ere.
Finantzaketa hiru ildotan banatuko da: 1.200.000 euro elkarte, fundazio pribatu eta gizarte-ekimeneko kooperatibentzat; 450.000 euro udalentzat, udal-erakunde autonomoentzat eta mankomunitateentzat; eta 118.000 euro sozietate anonimoentzat, erantzukizun mugatuko sozietateentzat, kooperatiba-sozietateentzat eta jarduera profesionaletan diharduten pertsona fisikoentzat.
Dirulaguntzek finantzatuko dituzte, besteak beste, lurraldean egiten diren jaialdi nabarmenak, praktika artistiko garaikide garrantzitsuen erakusketak eta Bizkaiarentzat interesgarriak diren beste ekimen kultural batzuk.
Eskaerak aurkezteko epea foru dekretua Bizkaiko Aldizkari Ofizialean argitaratu eta hurrengo egunetik 2026ko irailaren 11ra arte egongo da zabalik. Eskabideak Bizkaiko Foru Aldundiaren egoitza elektronikoan izapidetu beharko dira, www.ebizkaia.eus helbidean.