(Argazkia: Iban Aguinaga)
Genero lirikoaren obra gorena, ostiral honetan (azaroak 21) eta larunbatean (azaroak 22) taularatuko da, 19:30ean, Nafarroako Orkestra Sinfonikoaren parte-hartzearekin
AGAOk (Asociación Gayarre Amigos de la Ópera) Doña Francisquita obra ostiral honetan (azaroak 21) eta larunbatean (azaroak 22) aurkeztuko du Gayarre Antzokian, ia ikuslez betetako bi emanalditan. Ekoizpen liriko handi honen antzezpenak 19:30ean hasiko dira eta sarrera 12,50 eta 35 euro bitartean izango da.
Historiako zarzuela garrantzitsuena
Zarzuela ostegun honetan, hilak 20, aurkeztu da Gayarre Antzokian egindako prentsaurreko batean, eta, bertan, Iñigo Laborería AGAOko gerenteak nabarmendu du “luxua” dela Nafarroako Orkestra Sinfonikoa (OSN) izatea – Baluarte Fundazioarekiko lankidetza-hitzarmenari esker, lirika sustatzeko –, zeinaren parte-hartzeak “kalitate-ginga” ematen baitio ekoizpen horri, esan duenez.
Ondoren, Luis Miguel Alonsok, AGAOko presidenteak, Doña Francisquita konposatu zeneko garai historikoaren testuinguruan kokatu du, bere ezaugarri musikal eta eszeniko nagusiak azpimarratuz. Alonsok “historiako zarzuelarik garrantzitsuena” dela esan du, eta bere osotasunean programatzeak dakarren konplexutasuna nabarmendu du.
| ZARZUELA HANDI BAT HANDIENEN ARTEAN |
| Zarzuelarekin urtero egiten duen hitzorduan, AGAOk Doña Francisquita aurkezten du, Espainiako genero lirikoaren tontor eztabaidaezinetako bat. Bere musika argitsuak, erromantze, duo eta koruen distirak, eta erretratatzen duen Madril erromantikoaren bizitasunak ezinbesteko obra bihurtzen dute – – – Hiru ekitalditan banatuta, Amadeo Vivesen musikarekin eta Federico Romero eta Guillermo Fernández-Shawren libretoarekin, Lope de Vegaren La discreta enamorada lanean oinarritzen da – – – XIX. mendeko Madrilen girotuta dago inauterietan, eta Francisquita, Fernando eta Auroraren amodiozko korapiloak kontatzen ditu umorez, jelosiaz eta emozioz betetako trama batean. |
Jose Antonio Irastorza musika zuzendariak ekoizpen honetarako egindako ikerketa lan mardula azaldu du, jatorrizko bertsio osoa interpretatuko baita, etenik gabe, Amadeo Vivesek sortu zuen bezala. Halaber, Luis Ortega dantzariaren parte hartzea nabarmendu du, Espainiako Ballet Nazionaleko lehen dantzaria izan zena. Bestalde, David López eszena-zuzendariak ekoizpen honetako jantzien lan bikaina nabarmendu du, Roger Salas Pascual espezialista ospetsuak gainbegiratua, eszenako 200 jantzi ingururekin.
Nortasun handiko ahotsak
Inés Ballesteros eta Pepe Hannan protagonistek pertsonaien ahots- eta interpretazio-nortasunean sakondu dute, eta Javier Echarri abesbatzaren zuzendariak koru-masa zabalak egindako lan eskerga eta AGAOren abesbatzaren kemena eta kalitatea azpimarratu ditu.
Amaitzeko, zarzuela generoak Nafarroan duen jarraipen handia nabarmendu da, Doña Francisquitak asteburu honetan erregistratuko duen betegarri bikoitzak erakusten duen bezala.