(Argazkia: Ruben Plaza)
Hondarribiko Itsas Etxeak hartuko du asteazkenean amaituko den lehiaketa
60 tabernak hartuko dute parte datorren astelehenean Hondarribian hasiko den Euskal Herriko XX. Pintxo Lehiaketan. Txapelketa hiru sailkapen saiotan, finalaurreko batean eta final handian banatuko da, eta Itsas Etxean egingo da.
2006an estreinatu zen, eta Bidasoako udalerriak hartu ditu orain arteko edizio gehienak; hain zuzen ere, Gran Sol taberna izan da lehen sari gehien lortu dituen establezimendua (2010, 2013, 2017 eta 2023).
Edizio berriari begira, sei gipuzkoar izango dira txapelaren jabe egiten saiatuko direnak. La Perla (Donostia), itsas triku faltsuaren pintxoarekin; La Barra del Kojua (Donostia), Nafar tomate onduaren tartar-kokarekin txuleta olioarekin; Haizea (Donostia), ¿Y esto es? -rekin; Gran Sol (Hondarribia), Gato Basquerekin; Manolo (Irun), Bilinguerekin; eta Danontzat (Hondarribia), Okiduckyrekin.
Astelehenean egingo dira lehen eta bigarren sailkatze txandak. Asteartean hirugarren eta azken kanporaketaren eta finalaurrekoaren txanda izango da, eta, asteazkenean, final handia jokatuko da 10:00etatik 12:00etara, eta ondoren sari banaketa izango da. Showcooking formatuan egingo den lehiaketa gertutik jarraitu nahi duen jendearentzako sarbidea doakoa izango da. Gainera, streaming bidez zuzenean jarraitu ahal izango da.
20. edizioko epaimahai profesionala Nur de Fez jatetxeko Najat Kaanachek zuzenduko du. Hala ere, lehiaketaren fase ezberdinetan 25 epaimahai banatuko dira Euskal Herriko pintxorik onena zein den erabakitzeko.