Bilboko Udalak Errekaldeko IX. Umorezko Antzerki Erakusketaren bederatzigarren edizioa antolatu du, eta bost ikuskizun eskainiko ditu otsaileko lau ostiraletan, Errekaldeko udaltegian. Emanaldiak 19:00etan hasiko dira.
Sarrera librea izango da, baina beharrezkoa da telefono bidez erreserba egiteko gonbidapenetako bat eskuratzea, 671 559 937 zenbakira deituz. Sarrerak 10:00etatik aurrera eskatu ahalko dira, ikuskizuna hasi baino ordubete lehenagora arte, eta gehienez ere bi gonbidapen eskatu ahal izango dira pertsona bakoitzeko.
Bilboko Udaleko iturriek ostegun honetan jakinarazi dutenez, emanaldietan derrigorrezkoa izango da unean uneko babes eta higiene neurriak betetzea, eta ikusleek musukoa jarrita eraman beharko dute ikuskizun osoan.
Errekaldeko IX. Umorezko Antzerki Erakusketa otsailaren 5ean hasiko da, Las Poderío Varieté Trío talde andaluziarraren ‘Idas y venidas’ ikuskizanarekin. Astebete beranduago, otsailaren 12an, Companya de Pallassos La Tête konpainia katalanak ‘Tempus Fugit’ aurkeztuko du.
Azkenik, otsailaren 19an, El Mono Habitado eta Pez Limbo euskal taldeek ‘Gizaunka’ eta ‘Boxers’ obrak eskainiko dituzte, hurrenez hurren, eta zikloa bukatzeko, otsailaren 26an, Ganso & CIA euskal konpainiak ‘Panoli Kabareta’ taularatuko du.