Ekitaldiak bederatzigarren edizioa ospatuko du Cristina Enea parkean
Fin del mundo talde argentinarra, Hidrogenesse bikote bartzelonarra eta Peachy Joke laukote gipuzkoarra izango dira, besteak beste, abuztuaren 3an Donostiako Cristina Enea parkean ospatuko den Glad is the Day jaialdiaren bederatzigarren edizioan.
Gainera, aurten berrikuntza gisa, haurrentzako jarduerak izango dira Tabakalerako Zigarrogileen plazan eta azoka tradizionalean, 50 posturekin. Donostiako Egia auzoko kultur etxeak eta Dabadaba eta Le Bukowski kontzertu aretoek antolatzen dute jaialdia, Tabakaleraren eta Kutxa Fundazioaren laguntzarekin eta Kelerren babesarekin.
Karteldegi zabala
Bederatzigarren edizio honek 15 talde eta artista baino gehiagoren emanaldiak izango ditu 12:00etatik 21:00etara. Antolatzaileek adierazi dutenez, “rap/reggae, rock, pop edo punk estiloak” entzungo dira. Ohi bezala, Agertoki Nagusi bat egongo da, eta dantzaldia, berriz, trap, hip-hop eta Ruina Sonicaren goranzko soinuekin ziurtatuta egongo da. Gainera, behin gaua erorita, Dj-ak Le Bukowskin eta Dabadaban abesti onenak aukeratzen ariko dira asteburua luzatu nahi dutenentzat.
Antolatzaileek konpromisoa hartu dute “parkea hurrengo egunean irekiko dela ziurtatzeko, eguneroko gozamenerako baldintza ezin hobeetan”. Horretarako, antolakuntzak egituren muntaia ezinbestekora mugatzen du, eta edaria eta janaria ontzi berrerabilgarrietan edo birziklagarrietan saltzen dira. Paperontziak eta edukiontziak ere aldatzen eta kentzen joango dira, hondakinak pilatu ez daitezen.
Bi oltza, hamabost kontzertu
Guztira zazpi talde igaroko dira agertoki nagusitik, “Hidrogenesse bartzelonarren pop elektroniko kontzeptuala, Sistema de Entretenimiento-ren arcade punk frenetikoa, Pinpilinpussies-en garage-pop postpunka, Fin del Mundo argentinarren indie shoegaze-a, Mirua gipuzkoarren pop esperimentala, Peachy Jokeren rock energia eta OEPren jai espiritua”.
Klubari eta soinu elektronikoenei lotutako zortzi emanaldi ere izango dira Ruina Sónica agertokian, Linapary, Simona, Scientist, Miravalles, Infanta, Tronis, Puñales B2B LaMia Mari eta Putas Amak taldeekin.