Uztailaren 4tik 6ra arte diziplina anitzeko 13 ikuskizunez gozatzeko aukera egongo da Kaleka ekimenarekin
Asteburu honetan, Lekeitioko kaleek artea hartuko dute berriz ere, Kaleka ekimenaren 35. edizioaren eskutik.
Uztailaren 4tik 6ra bitartean ospatuko den Lekeitioko Kale Arteen Jaialdiak, herriko espazio esanguratsuenak eszenatoki bihurtuko ditu hiru egunez. Bertan, diziplina anitzeko 13 ikuskizun eskainiko dira, Euskal Herriko zein nazioarteko konpainien partaidetzarekin. Publikoa parte-hartzera eta esperimentatzera gonbidatuko duen jaialdiak proposamen berritzaile eta emozionalak ekarriko ditu, kale artearen bidez herria biziberrituz.
Egitaraua anitza eta aberatsa da: 10 ikuskizun Kaleka Programa Ofizialean eta 3 lan Kaleka Scratch atalean aurkeztuko dira. Aurtengo programak diziplina ugari uztartzen ditu: zirkua, dantza garaikidea, objektuen antzerkia, performance poetikoak eta ikus-entzuleak inplikatzen dituzten formatu parte-hartzaileak.
Programa ofizialaren baitan, ikuskizun, performance eta esku-hartze artistikoak eskainiko dira Lekeitioko hainbat espaziotan, bai ohiko guneetan, bai ikusleentzat ezohiko edo ezezagunetan. Bestalde, Scratch atalean, sorkuntza-prozesuan dauden lanak erakutsiko dira, ikus-entzuleekin elkarrekintza eta hausnarketa sustatuz.
Hori horrela, Kalekaren 35. edizioa ez da jaialdi bat soilik; kultur mugimendu bizia da, kale arteak komunitatean sustraitzen dituena. Arte eszenikoak herritarren eskura jartzen ditu, hurbiltasunetik, ausardiatik eta elkarlanetik abiatuta.
Programazio osoa Kalekaren webgunean ikus daiteke.