NUPeko Ezagutzaren Dibulgaziorako eta Kultura Zientifikorako Laboral Kutxa Katedrak antolatutako sariketaren erakusketak hamar lan biltzen ditu
Nafarroako Unibertsitate Publikoko (NUP) Ezagutzaren Dibulgaziorako eta Kultura Zientifikorako Laboral Kutxa Katedrak antolatutako Arte eta Zientziaren I. Lehiaketaren erakusketa kolektiboa hartuko du Iruñeako Gomas Fabrikak. Erakusketak hautatutako hamar artistaren lanak aurkezten ditu, artearen, zientziaren eta sormenezko adimen artifizial berrien arteko harremanak ikuspegi desberdinetatik aztertzen dituztenak. Erakusketa ekaina osoan bisitatu ahal izango da Iruñeako kultur gune honetan.
Inaugurazio ekitaldian Javier Kortajarena Laboral Kutxako lurralde zuzendariak, Ramon Gonzalo NUPeko errektoreak eta Joaquin Sevilla Katedrako zuzendariak hartu zuten parte. Artista finalista asko ere bertan izan ziren. Azpimarratzekoa da Jorge Isla (lehen saria) eta Maria Jose Sanchez (bigarren saria) izan direla lehiaketako irabazleak.
Bi kultura
Sariketa hau Katedrak 2025erako bultzatutako jardueren barruan kokatzen da, “bi kulturen” —zientifikoa eta humanistikoa— arteko zisma tradizionalari buruzko hausnarketa kritikoa egiteko plataforma gisa sortua, azken urteotan adimen artifizial generatiboen agerpenak eta hedapenak berpiztu duena.
Bere hitzaldian, Joaquin Sevillak azaldu zuenez, “Katedraren sorrerako helburua gizarteari ezagutza zabaltzen laguntzea da. 2020an sortu zenetik, kultura zientifikoko jarduerak sustatzearen alde egiten dugu, eta, bereziki, jakintza zientifikoak eta ikuspegi artistikoak uztartzen dituzten proiektuak bultzatzearen alde”.
“Gure ideia da —erantsi zuen— artistei proposatzea hausnar dezatela gizartean garrantzia duten arazoei buruz. Hortik aurrera, unibertsitatetik laguntzen diegu beren lanak gauzatzeko behar duten ezagutza zientifiko guztiarekin. Aurreko edizioetan pandemien historia edo energia bezalako gaiak landu ditugu. Aurten, adimen artifizial generatiboa izan da fokua, eta lehiaketa izan da gure tresna artearen, teknologiaren eta pentsamendu kritikoaren arteko elkarrizketa hori bideratzeko”.
IAren tresnak erabiltzea nahitaezko baldintza ez bazen ere, aukeratutako lan guztiek teknologia horri lotutako tentsio etiko, tekniko, estetiko edo filosofikoak jorratzen dituzte nolabait. Epaimahaiak proposamenen kontzeptualizazioa, esperimentazio formala eta gaitasun kritikoa baloratu zituen.
Bestalde, Ramon Gonzalo errektoreak nabarmendu zuenez, “unibertsitatea ezin da egon eztabaida garaikide horietatik kanpo. Horrelako proiektuak diziplinen, lengoaien eta publikoen arteko zubiak eraikitzeko moduaren adibide dira, dibulgazio zientifikoa gizartearen bizitza kulturalean txertatuz”.
Hamar artistak
Finalera heldu diren 10 artisten lanak biltzen ditu erakusketak, eta haien lanak ikusgai egongo dira ekaina osoan zehar:
- Jorge Isla (1. saria)
- María José Sánchez (2. saria)
- Pedro Marco
- David Benito
- Andrea Abalia
- Ernesto Neftaly
- Joan Fierro
- Karlos G. Liberal
- Elaia Blades
- Neisa Escobar Canedo
Gomas Fabrikan (Fuente de la Teja kalea, 12, Lezkairu) dago ikusgai erakusketa, doan, ekainaren 30era arte.