Maiatzaren 30ean, Pale Palacio clownaren ikuskizunak poesia bisuala, malabareak, objektuen manipulazioa eta antzerki fisikoa uztartuko ditu
Nafarroako Antzerki Eskolak EnFOCA, Pale Palacioren clown poetikoaren ikuskizun berriaren erabateko estreinaldia hartuko du ostiral honetan, maiatzaren 30ean. Ikuskizuna ENTn bertan egindako egonaldi teknikoaren emaitza da. Emanaldi berri bat egongo da larunbatean, hilak 31, 19:00etan.
Adin guztietako jendearentzat da proposamena, 10 urtetik aurrera. enFOCA proposamen eszeniko bat da, ikuslea Akiak unibertsoan murgiltzera gonbidatzen duena, galdutako maitasunaren bila dabilen eta bizitza partekatzeko gogo sakona duen izakia.
Antzezlanak umorea, poesia bisuala, malabarismoak, objektuen manipulazioa eta antzerki fisikoa bateratzen ditu, jolasa eta emozio sakonena uztartzen dituen unibertso eszenikoa sortuz. Alde horretatik, barrura begiratzeko gonbidapena da enFOCA, eta jolasaren, samurtasunaren eta barrearen bidez munduan egoteko beste modu bat deskubritzeko gonbita.
‘La mujer esqueleto’
Mujeres que corren con los lobos liburuko “La mujer esqueleto” ipuinean oinarrituta, antzezlanak eszenaratze bat erakusten du, non arte bisualak protagonismo berezia hartzen duen. Sorkuntza honetan, hologramaren proiekzioek eta esplorazioak adierazpen aukera berriak irekitzen dituzte, giro onirikoak sortuz eta obraren imajinarioa zabalduz.
Muntaiaren zuzendaria Piero Partigianoni clown eta pedagogo ezaguna da, Granadako El Semillero nazioarteko eskolan irakaslea. Gainera, Andaluziako hainbat hiritako antzerki unibertsitarioko irakaslea da, eta Commond Ground proiektu europarrean kolaboratzen du, clownaren inguruan duen ikuspegia Italiara, Alemaniara eta Poloniara eramanez.
Bestalde, Cristian Palacio Ojeda aktorea, clowna, malabarista eta Brote Clown Kultur Elkartearen sortzaileetako bat da. Espainian, Frantzian, Alemanian, Italian eta Argentinan egin ditu ikuskizunak. Bere lanak hizkuntza artistiko desberdinak integratzea bilatzen du, giza begirada sakon batetik.