Alfonso Aijón Ibermúsicaren sustatzaile eta sortzaileak eta Idoia Solores ikertzaileak jaso dute Donostiako Orfeoia-UPV/EHU Saria. Aurten 24. edizioa beteko du, eta musika-sorkuntzan egindako ibilbide profesionala aitortzeko eta musika-ikerketa sustatzeko sortu zen.
Euskal Herriko Unibertsitatetik azaldu dutenez, Idoia Solores ikertzaileak jaso du sari hau, ‘Ikerketa musikala sustatu eta bultzatu’ kategorian, ‘Pasioaren eraikuntza estetiko-morala J.S. Bachen San Mateoren eskutik eta denboran zehar duen iraunkortasuna’ lanagatik. Era berean, Alfonso Aijón sustatzaileari musika klasikoko kontzertuen sustapenean “egindako lan eta ibilbide bikainagatik” saria eman diote.
Sariak ostegunean banatuko dira, hilak 15, 19:00etan, UPV/EHUko Ignacio Mª Barriola Zentroan, Donostian. Ekitaldian Antxon Elosegi Donostiako Orfeoiko lehendakariak eta Juana Goizueta EHUko Gipuzkoako Campuseko errektoreordeak hartuko dute parte.
Ekitaldiaren amaieran, Donostiako Orfeoiak emanaldi labur bat eskainiko du bere errepertorio tradizionaleko lanekin. Ekitaldia jende guztiarentzat zabalik egongo da, edukiera mugatuarekin.
Alfonso Aijonek 1970ean sortu zuen Ibermúsica, Espainian dagoen musika klasikoko enpresa pribaturik handiena. Artisten agentzia gisa hasi ondoren, Ibermúsica Europako erreferentziazko musika klasikoko kontzertuen sustatzaile gisa definitu zen, eta lehen aldiz New York Philharmonic, Chicago Symphony, London Symphony Orchestra edo Montrealgo Orchestre Symphonique bezalako orkestrak eraman zituen Espainiara.
Era berean, Aijonek lortu zuen maisu handiak lehen aldiz Espainiara joatea beren orkestrak zuzenduz, besteak beste, Yevgueni Mravinski, Claudio Abbado, Georg Solti, Leonard Bernstein, Riccardo Muti edo Pierre Boulez.
Hogei urte baino gehiago
Idoia Solores Etxabe doktorea da (Cum Laude aipamena) “J.S. Bachen Pasioaren eraikuntza estetiko-morala san Mateoren arabera eta denboran zehar duen iraunkortasuna’ doktore-tesiarekin, eta hemen saritua izan da ‘Filosofia, Zientzia eta Balioak” programaren barruan, Javier Aguirre Santosen (UPV/EHU) eta Luis Antonio González Marínen (CSIC) zuzendaritzapean.
20 urte baino gehiago daramatza Donostiako Antigua-Luberri BHIn irakasle. UPV/EHUrekin ere lan egin du, unibertsitate-hedapeneko ikastaro batzuk emanez. Filosofian eta Hezkuntza Zientzietan lizentziaduna da (UPV/EHU 1985) eta Musiken lizentziaduna (Paris VIII 1986).
Zinemagintzaren Historia eta Estetika Unibertsitate Masterra (Valladolideko Unibertsitatea, 2003) eta Ikerketa Nahikotasuneko Diploma ditu, UPV/EHUren “Filosofiako egungo arazoak” programaren barruan (2007). Film labur batzuetarako musika ere konposatu du eta ikus-entzunezko sorkuntza-lan batzuk ere egin ditu.