Guggenheim Bilbao Museoak atari berri bat jarri du martxan bere jarduerarekin zerikusia duten ekoizpen propioko ikus-entzunezko edukiak zabaltzeko, batez ere Bilduma eta programazio artistikoarekin zerikusia dutenak. Museoak iragarritakoaren arabera, plataforma horren eskaintza honako hauek osatuko dute: hitzaldiak, erakusketei buruzko dokumentalak, elkarrizketak, mahai-inguruak eta hainbat hezkuntza-programa.
Doan sartu ahal izango da kanalera, eta oraingoz 200 bideo baino gehiago ditu, hainbat kategoriatan banatuta: inaugurazio-hitzaldiak, ingurumen-jasangarritasuna, arte biziak (musika, dantza, performancea) eta serieak. Aldi berean, serieak lau ataletan banatzen dira: Museoko erakusketei buruzko dokumentalak; Guggenheim Bilbao Insights (Museoko kuratoreen eta Bildumako artisten arteko elkarrizketak); Perspektibak (zinema, musika, moda, dantza edo gastronomiako profesional ezagunen hausnarketak Museoaren Bildumako obra enblematikoen inguruan, La Caixa Fundazioarekin lankidetzan egindako ekoizpen bat), edo Deskubritu (museo-jarduera bereziei buruzko bideoak).
Halaber, kanal berriak zuzeneko emanaldien atari bat izango du, eta bertan, Museotik Auditorioan programatzen diren jardueretara edo beste espazio batzuetara sartzeko aukera izango dute ikusleek, hala nola hitzaldietara, ekitaldietara edo erakusketetara bisita gidatuetara.
“Ikus-entzunezko plataforma horri esker, publiko orokorrak eta Communityk osatzen duenak (Museoaren artearen eta kulturaren inguruko komunitatea, 24.000 Lagunek eta 240.000 Jarraitzailek osatua) aukera izango du artera eta Museoak sortzen dituen jardueretara modu intuitibo eta errazean hurbiltzeko, gailu mugikorretatik edo tabletetatik, Museoaren webgunearen bidez. Teknologia berrien eta webguneak eskaintzen dituen aukera hobetuen bidez belaunaldi berriak erakartzeko helburuarekin ere sortu da “, azaldu dute museotik.