‘Euskararen Etxea, plazara’ erakusketa ibiltariak Leioan kokatutako Euskal Herriko Unibertsitateko (EHU) Bizkaiko campusean hasi du dagoeneko bere ibilbidea, EHU Kulturaren laguntzarekin. Erakusketa ostegunean ireki zen, Hizkuntzen Europako Egunaren bat eginez, eta abenduaren 4ra bitarte izango da ikusgai bertan.
Erakusketa hau Bilboko Euskararen Etxean dagoen Euskararen Interpretazio Zentro berriaren lagin bat da, zentroko edukietatik abiatuta ondu baita. Zentro berria 2023ko otsailean inauguratu zen, eta Kirmen Uribe idazleak eta Patxi Baztarrika soziolinguistak osatutako talde zientifikoaren lanaren emaitza da, baita 60 erakunde eta partikular baino gehiagoren parte hartzearena ere, elkarlanean egindako proiektua baita.
Bada, bere arduradunek adierazi dutenez, erakusketaren bidez, Euskararen Etxeak «bere hormak gainditu» eta Interpretazio Zentro berriaren edukien lagin txiki bat aurkeztu nahi du. Gainera, herritarrak bere egoitzan bertaratzera gonbidatu nahi ditu, «bisita esperientzial eta ludiko batetik abiatuta, bisitariak euskararen izaera poliedrikoan murgil daitezen».
‘Euskararen Etxea, plazara’ erakusketaren helburua da «euskara, antzinako hizkuntza izateaz gain, gaztea, zirraragarria eta eraikitzen ari den hizkuntza dela ezagutaraztea, bai eta munduko hizkuntza aniztasunaren parte dela ere nabarmentzea».
Horretarako, erakusketak askotariko edukiak bildu ditu, besteak beste, euskararen egunez eguneko egoeraz ohartarazten duten datuak, euskararen historia josi duten pertsonaia eta gertaerak, euskararen etorkizunerako erronkak edo euskal kulturaren aberastasuna eta kalitatea islatzen duten edukiak.
Bisitarien testigantzak
Horrekin batera, antolatzaileek nabarmendu dute «erakusketak egingo duen ibilbidean tokian tokiko ezaugarri eta datuak» ere erakutsiko dituela, udalerri edo erakundeekin lankidetzan gauzatuko baita, beren ezaugarri eta ñabardunak erakusteko asmoz. Hala, EHUk emandako euskarari buruzko hainbat datu jaso ditu Leioako campuseko erakusketak, eta bertan dagoen bitartean, hezkuntza komunitateak euskara nola bizi duen erakutsiko du.
«Horretaz gainera, bisitariek haien testigantzak ere utzi ahalko dituzte bisitariek euskararekin duten harremana aztertzea xede duen harien jolas baten eta galdera irekien bidez», esan dute.
Azkenik, erakusketak lekua egin dio Gaitu proiektuari. Eusko Jaurlaritzak, Nafarroako Gobernuak eta Euskararen Erakunde Publikoak bultzatutako egitasmoa da, 2023an sortua, adimen artifizialak euskaraz egin dezan, Common Voice proiektuaren parte gisa.